Monday, August 20, 2018

ကံစမ်းမဲဆိုတာ ကံပါမှလား




မနော ငယ်ငယ်တုန်းကတော့ ကံစမ်းမဲဆိုတာ ရှိသလား မရှိသေးဘူးလားဆိုတာ မမှတ်မိတော့ပေမယ့် သိတတ်စထဲက ဈေးကွက်စီးပွားရေးအတွက် စီးပွားရေးသမားများရဲ့ ရောင်းကုန်များကို မဝယ် ဝယ်ချင်အောင် လုပ်ဆောင်လာမှုတွေဟာ ခုချိန်ထိ ပိုမို ကျယ်ပြန့်လာတာကို တွေ့မြင်နေရပါတယ်။ တချို့ကတော့ ကုန်ပစ္စည်းအတွက်၊ တချို့ကတော့ ရွှေဆိုင်တွေမှာကျတော့ ဝယ်တဲ့ပစ္စည်းပေါ် မူတည်ပြီး ဗလာမပါ ကံစမ်းမဲဆိုပြီး လုပ်ကြတယ်။ လက်ဆောင်သဘောမျိုးလည်း ဖြစ်အောင် ဝယ်သူတွေလည်း စိတ်ဝင်စားပြီး ထပ်ပြီး ဝယ်ချင်အောင် ဆွဲဆောင်တဲ့နည်းတစ်မျိုးပဲလားဆိုတာ စီးပွားရေးသမားတွေအတွက် တွက်ခြေ ကိုက်တဲ့ နည်းတစ်မျိုးလားဆိုတာ ထင်စရာပါပဲ။ နောက် ဘာနေ့မို့လို့ လျော့ဈေးနဲ့ရောင်းတယ်ဆိုပြီး တစ်ခုဝယ် တစ်ခုလက်ဆောင်ဆိုပြီး နှစ်ခုစာ ဈေးနှုန်းတင်ထားသလားဆိုတာ ဝယ်သူတစ်ယောက်အနေနဲ့ မြင်မိမှာ မဟုတ်လောက်ဘူးထင်ပါတယ်။ မနောလည်း လူတွေထဲ လူတစ်ယောက်မို့ ဒီလို ကံကို စမ်းတဲ့အရာလေးတွေကို စိတ်ဝင်စားမိပါတယ်။ ဒါဟာ တရား သဘောနဲ့ ကြည့်ရင် လောဘပဲပေါ့။ သူများ ပစ္စည်းကို အလကားလိုချင်တယ်လို့ ကိုယ့်စိတ်ကို သုံးသပ်မိပါသေးတယ်။ ဒါပေမယ့် ပုထုဇဉ်လူသားတစ်ယောက်ဖြစ်တဲ့အတွက် ဒီကံစမ်းမဲကမ္ဘာထဲက မရုန်းထွက်နိုင်ခဲ့သေးပါဘူး။ ဒီတော့ ကံစမ်းမဲအစစ်အမှန်ဟုတ် မဟုတ်ကို ကိုယ်တိုင်စမ်းသပ်ပြီး လုပ်ကြည့်မိတာလည်း ပါတာပေါ့လေ။ မနော ကံကောင်းခဲ့တာလား၊ ရှေးဘဝက ကုသိုလ်တရားကြောင့်လား ခုလက်ရှိ ကောင်းမှုကြောင့်လားဆိုတာ မနောကိုယ်တိုင်လည်း သေချာမပိုင်းဖြတ်နိုင်သေးပါဘူး။ လူစိတ်ဆိုတာလည်း ပြောရတော့ခက်သား။ ကိုယ်ကသာ မပေးချင်တာ သူများဆီကတော့ လိုချင်မိတာ လောဘ မောဟတွေ အတော်များနေတာကြောင့်လား။ မှတ်မှတ်ရရ ကံကောင်းခဲ့တာလေးတွေ ပြောရရင်တော့ အဲ ကံကြောင့်လား၊ ကောင်းမှုပြုတာကြောင့်လား၊ ကုသိုလ်တရားကြောင့်လားဆိုတာ မသိပေမယ့် ခုလက်ရှိတော့ တတ်နိုင်သလောက် စိတ်ကောင်းထားပြီး ကောင်းမှုကုသိုလ်ကို တစ်နိုင်တစ်ပိုင်လုပ်ရင်း ကံငါးပါးကို လုံခြုံအောင် တတ်နိုင်သမျှ ထိန်းနေမိတာတော့ သေချာလှပါတယ်။ နောက် မဲဆိုတာ လောင်းကစားတစ်မျိုးလို့လည်း ဆိုလိုရပါတယ်။ ကိုယ်ကတော့ နှစ်လုံးသုံးလုံးကို စိတ်လည်းမဝင်စားသလို တစ်ခါမှလည်း မထိုးခဲ့ဖူးဘူး။ သူများလုပ်ရင်လည်း ကန့်ကွက်ခဲ့တယ်။ ပေးရတာများပြီး ရတာနည်းတာပဲ မြင်နေမိခဲ့တာကိုး။ နောက် ဒါဟာ မကောင်းဘူးလို့လည်း ခံစားမိတာလည်းပါတယ်။ ကံစမ်းမဲရဲ့ မှတ်မှတ်ရရ သတိရစရာတွေကို ပြောပြဦးမယ်။ တက္ကသိုလ် တတိယနှစ် စာမေးပွဲဖြေအပြီး သူငယ်ချင်းတွေနဲ့ ဘားအံ၊ သာမည ဘုရားဖူးခရီးစဉ်ထွက်တုန်းက အပြန်မှာ စီးလားတဲ့ ကား(ရွှေကြေးစည်)မှ ကားတစ်စီးလုံးပါ ခရီးသည်များအားလုံးကို ကံစမ်းမဲ နှိုက်ပေးပါတယ်။ မဲပေါက်တဲ့သူက ဆရာတော်ကြီးရဲ့ မှန်ဘောင်ပါတဲ့ ပုံတော်ကို ပူဇော်ရမှာ ဖြစ်ပါတယ်။ ကားတစ်စီးလုံးဆိုတော့ လူ ၄၀- ၄၅ လောက်ရှိတာပေါ့ မဲဖောက်မှာက တစ်ဆုပဲတဲ့။ ကံစမ်းမဲဖလားကို ရှေ့ဆုံးထိုင်တဲ့သူကနေ စပြီး နှိုက်ရပါတယ်။ ချက်ချင်းမဖွင့်ခိုင်းသေးပဲ လူအကုန်မဲနှိုက်ပြီး ဖွင့်ကြည့်ရမယ်လို့ ကားသမားက ပြောတော့ နှိုက်ပြီးတဲ့သူတွေက မဲလိပ်ကို ကိုင်ထားပါတယ်။ မနောတို့အဖွဲ့က နောက်ဆုံးမှာထိုင်တာဆိုတော့ ရမယ်လည်းမထင်ပါဘူး။ မဲလိတ်က သူများနှိုက်ပြီးမှ ကိုယ်တွေရမယ်ဆိုတော့လေ သိပ်ပြီး အာရုံမထားပဲ အနားဖလားရောက်မှတစ်ခုယူလိုက်ပါတယ်။ အဲ မဲလိပ်က စာရွက်ကို သေးသေးလေး လိပ်ပြီး အအေး သောက်တဲ့ ပိုက်ထဲကို ထည့်ထားတာဆိုတော့ တော်တော်ကို သေသပ်လှတာကိုတွေ့ရတယ်။ ဒါနဲ့ အကုန်ဖွင့်လို့ရပြီးလို့ပြောလိုက်တာနဲ့ ရတဲ့တစ်လိပ်ကို ပိုက်ကနေ ထွက်အောင် အရင်ခေါက်လိုက်တယ်။ ပြီးမှ စာရွက်ကို ဖြန့်ကြည့်မိပါတယ်။ ဖြန့်လည်းဖြန့်လိုက်ရော မဲလိပ်ထဲမှာ စာလေးတစ်ကြောင်းတွေ့ရတယ်။ စာတမ်းလေးက ကံထူးရှင်တဲ့လေ။ အရမ်းအံ့သြမိသွားတယ်။ မထင်လည်းမထင်ထားဘူး။ နောက် ဘုရားဖူးခရီးမှာက လူကြီးတွေများတာဆိုတော့ လူတိုင်းက ဆရာတော်ကြီး ပုံတော်ကို အရမ်းပူဇော်ချင်တဲ့သူတွေကြီးပဲလေ။ ကားသမားက မဲလိပ်ဘယ်သူပေါက်လဲ လှမ်းမေးတော့ ခဏတာ ငြိမ်နေမိတယ်။ ပြီးတော့မှ စာရွက်လေးထောင်ပြမိတယ်။ ကားတစ်စီးလုံးမှာ အသံတွေက အပ်ကျသံတောင်မကြားရလောက်အောင် တိတ်ဆိတ်ငြိမ်သက်နေတယ်လေ။ ကိုယ့်ရဲ့အသက်ရှူသံတောင် ကိုယ်ပြန်ကြားနေမိတယ်။ ကားသမားက မဟာကံထူးရှင် ကားရှေ့ကို ထွက်ခဲ့ပါလို့ ခေါ်တော့ ဒူးတွေတောင် တုန်တယ်။ ကားရှေ့ဆုံးနားမှာထိုင်တဲ့အဘွားတစ်ယောက်က သမီး အဘွားကို ပြန်ရောင်းပါလားလို့ ပြောပါတယ်။ မနောလည်း မျက်ရည်တောင်လည်မိတယ်။ မနောကတော့ ဆရာတော်ကြီးက ငါ့ကို သာသနာပြုဖို့ ရွေးချယ်လိုက်တာလို့ပဲ ကိုယ့်ဘာသာ ခံယူလိုက်မိပါတယ်။ ဘယ်သူမှ ပြန်မရောင်းပါဘူး။ ပုံတော်ကလည်း အရမ်းကြီးတော့ နောက်မှ ကားဂိတ်ကို သတ်သတ်သွားယူရပါတယ်။ ကိုယ့်အတွေးနဲ့ကိုယ်ပေါ့ အိမ်မှာ ဘယ်နေရာပူဇော်ထားရမလဲဆိုပြီး တွေးပြီး အိမ်ပြန်ရောက်တော့ မေမေက သမီးတဲ့ ဘုရားစင်ဈေးသက်သာလို့ ဝယ်ထားတယ်တဲ့။ ကြည့်လိုက်တော့ တိုက်ခန်းတွေမှာ ထားတဲ့သစ်သားနဲ့လုပ်ထားတဲ့ ဘုရားစင်ဖြစ်နေတယ်။ မနောတို့အိမ်မှာက ဘုရားစင်က အိမ်နဲ့တွဲရက်လုပ်ထားတော့ ဆရာတော်ပုံတော်ကို ပူဇော်မယ့်နေရာလည်းအဆင်သင့်ရရှိသွားပါတော့တယ်။ နောက်ပိုင်းလည်း တတ်နိုင်သလောက် ကောင်းမှုများများလုပ်မယ်ဆိုတဲ့စိတ်က ပိုမိုကိန်းအောင်းလို့ နေမိပါတော့တယ်။ နောက် ကံစမ်းမဲအကြောင်းတွေ ဆက်ပါဦးမယ်။

ကံစမ်းမဲတစ်ခါ ပေါက်ပြီးထဲက ကံစမ်းမဲဆိုတာ ဘာကြောင့်လုပ်တာလဲ၊ ဘယ်လိုလူတွေပေါက်တာလဲ စဉ်းစားမိရင်းနဲ့ ၂၀၀၆ ခုနှစ်မှာ အံ့သြဖွယ်ရာ အကြီးအကျယ် ဖြစ်ရပ်တစ်ခု ထပ်မံဖြစ်ပွားခဲ့ပြန်ပါတယ်။ အဲဒါဘာလဲဆိုတော့ လူအတော်များများ စိတ်ဝင်စားတဲ့ အမေရိကန်ဒီဗွီလို့ ခေါ်တဲ့ အမေရိကန်ရဲ့ ကံစမ်းမဲလက်မှတ်ပဲ ဖြစ်ပါတယ်။ အရင်တုန်းကတော့ လမ်းဘေးမှာ စာအိတ်နဲ့ ထည့်ပြီး ရောင်းချတာကို တွေ့ရှိရပါတယ်။ လူတွေက ဝယ်ပြီး ဖောင်ဖြည့်ပြီး စာတိုက်က ထည့်ကြရပါတယ်။ သူငယ်ချင်းတွေက အင်တာနက်ခေတ်စားလာတော့ အကူညီတောင်းပါတယ်။ ထည့်ပေးဖို့ကို ပြောတော့ အေး လုပ်ပေးမယ်ပြောပြီး ဘာရယ်မဟုတ် သူတို့ကို ဖောင်ဖြည့်ပြီး ထည့်ပေးတဲ့ လုပ်ငန်းလုပ်တဲ့နေရာကို ခေါ်သွားပါတယ်။ နောက်ပြီး ဓာတ်ပုံကိုလည်း သူတို့က တိုက်ရိုက်တစ်ခါထဲ ပိုက်ဆံမပေးရပဲ ရိုက်ပေးပြီး တင်ပေးပါတယ်။ ကိုယ်က ခေါ်သာသွားတာ သိပ်စိတ်မဝင်စားဘူး။ သူငယ်ချင်းတွေက နင်လည်း တင်ပါလားလို့ပြောတော့ မတင်ပါဘူး။ ငါက မလုပ်ရင် မလုပ်ဘူး။ လုပ်ရင် အောင်မြင်မှ ကြိုက်တာလို့ ပြောမိတယ်။ နောက် ဆက်ပြီး ပြောလိုက်မိသေးတယ်။ ငါ ပေါက်နေရင် တစ်ယောက်ထဲမသွားရဲဘူးလို့ ပြောလိုက်တော့ သူငယ်ချင်းက ငါ့အစ်ကို ခေါ်သွားတဲ့ နောက်ပြီး ပြောပါတယ်။ မနောကလည်း အေးဟာ တင်လိုက်မယ်လို့ပြောပြီး တင်ခဲ့မိတယ်။ ဒါပေမယ့်လည်း မေ့မေ့ပျောက်ပျောက်ပါပဲ။ ၄ လပိုင်းမှာ အိမ်ကို စာတိုက်ကနေ စာရောက်လာတယ်။ ဖွင့်ကြည့်တော့ အမေရိကန်စင်တာက ဒီဗွီနံပါတ် ဘယ်လောက် မဲပေါက်တာ အကြောင်းကြားစာ ဖြစ်နေတာကို အံ့သြဖွယ်ရာ မြင်တွေ့ရတယ်။ ဒါတောင် ကိုယ်က အင်းလေ သူငယ်ချင်းတွေဆီလည်း လာမှာပဲလို့ တွေးမိသေးတယ်။ ညနေရောက်တော့ အတူတူတင်တဲ့သူငယ်ချင်းကို နင့်ဆီ စာတိုက်က ရောက်လာတယ်မလားလို့ မေးလိုက်တော့ မရောက်ပါဘူး ဘာဖြစ်လို့လဲပေါ့ သူတို့က မိသားစုလိုက် နိုင်ငံခြားသွားဖို့ ရူးနေတဲ့ သူတွေဆိုတော့ သူကို ပြေးပြီးပြောမိတာပေါ့။ ဟယ် ငါ့ဆီ ဘာမှမလာဘူး။ နင့်ဆီ ဘာလာလဲလို့မေးတော့ အမေရိကန်စင်တာကနေ ဗီဇာပေါက်တယ်ဆိုတာ လှမ်းပြောတဲ့စာလို့ ဖောင်ပါ ပါတယ်ပေါ့။ တစ်ကမ္ဘာလုံးဆိုင်ရာ ပေါက်မဲနံပါတ်က ၃၂၂ နဲ့ ပေါက်တာ ဖောင်ပြန်ဖြည့်ပြီး အမေရိကကို တန်းပို့ပေးဖို့ သံရုံးလိပ်စာတွေလည်း ပါတယ်ပေါ့။ သူက သူ့အစ်ကိုကို ယူပြီးသွားပါလားတဲ့။ မနောကတော့ သွားဖို့ မသွားဖို့လည်း ခေါင်းထဲမှာမရှိဘူး။ ပြန်တင်ဖို့တောင် ချီတုံချတုံဖြစ်လို့ ဒါနဲ့ စိတ်ရှုပ်ထွေးမှုပေါင်းများစွာနဲ့ ဒုတိယစာကိုလည်း အတော်နောက်ကျမှ ပြန်တင်လိုက်တယ်။ လူအတော်များများက သိပ်နားမလည်တော့ ဒီဗွီပေါက်ရင် သွားရမယ်လို့ပဲ သိထားကြတာကို ကုန်ကျစရိတ်ဘယ်လောက်၊ သွားနေရမယ့်နေရာလိပ်စာ၊ နောက် စတဲ့ အနေအထားတွေ အများကြီးပဲ ကြုံခဲ့ရတယ်။ ငွေကြေးမပြည့်စုံတဲ့ သူတွေအတွက် မစွန့်စားရဲခဲ့တာလည်း ပါပါတယ်။ နောက် အရာရာ ဒုက္ခဆင်းရဲကို ကြိုတွေးပြီး ရှေ့ဆက်မတိုးရဲခဲ့တာလည်း ကိုယ့်ဘာသာကိုယ် သိခဲ့တယ်။ မသွားခဲ့ရလို့ နောင်တရနေလားဆိုတော့လည်း မရခဲ့ပါဘူး။ အဲဒီအချိန်က ဘာစဉ်းစားမိလဲဆိုတော့ ဒီဟာ မဲမပေါက်ပဲ ထီပေါက်လို့ ပိုက်ဆံရရင်တော့ ချက်ချင်းလှူဖြစ်ဖို့ စိတ်ပဲ ရှိခဲ့တယ်။ နောက် ဗုဒ္ဓဂယာကိုလည်း အရမ်းဖူးမြော်ချင်နေတာ ခုချိန်တိုင်ပါပဲ။ ဒါနဲ့ ပြန်တင်တဲ့စာကို ငွေကြေးမတတ်နိုင်လို့ DHL နဲ့ကို ပေါက်တဲ့သူတွေ စုလိုက်ပြီး တစ်ခါထဲ ထည့်ပေးလိုက်ပါတယ်။ တကယ်လို့ အသေးစိတ်အစအဆုံး သိချင်တဲ့သူတွေရှိရင်လည်း မနောကို သိချင်တာတွေ မေးမြန်းလို့ရပါတယ်နော်။ ဒုတိယစာ ပြန်တင်တာ တစ်ပတ်အကြာမှာ စာတိုက်ကနေ ပြန်ကျလာပါတယ်။ ကိုယ့်ဆီစာလာတာနဲ့ သံရုံးကို ကိုယ့်အတွက်ဗီဇာ ပို့လိုက်ပြီး ဆိုတာ သိနေခဲ့ပါတယ်။ ဒါပေမယ့် ဘာမှ မလှုပ်ရှားခဲ့ပါဘူး။ နောက် သံရုံးကနေ အကြိမ်ကြိမ် ဗီဇာချန်ထားပါတယ်လို့ ဖုန်းခဏခဏ လာတာကိုလည်း အခြေအနေအရပ်ရပ်ကြောင့် ရှေ့ဆက်မတိုးပဲ ဒီနေရာမှာပဲ ကံစမ်းမဲပေါက်ပြီး လက်မှတ်ပျောက်ခဲ့တာပဲ ဖြစ်ပါတော့တယ်။

ကံကိုစမ်းတာလား ကုသိုလ်ကိုစမ်းတာလားဆိုတာ မသိပေမယ့် ကျွန်မကတော့ ကံစမ်းမဲဆိုတာနဲ့ အမေရိကန်ဒီဗွီပေါက်ပြီးထဲက လန့်ပြီး နောက်တွန့်နေမိပါတယ်။ အဝတ်အထည်ဆိုင် သွားတော့လည်း အမရေ ကံစမ်းမဲပါတယ်နော် တစ်ထည် ဝယ်ရင် တစ်ထည် လက်ဆောင်ဆိုတာနဲ့ ကြည့်ပြီး မဝယ်ပဲ ပြန်ထွက်ခဲ့တဲ့ နေရာတွေလည်း ရှိလာပါတယ်။ နောက် ကော်ဖီဝယ်သွားတော့လည်း Gold Rose မှာ ကံစမ်းမဲပါပြန်ရော မဲကတော့ ၁၀၀၀ ကျပ်တန်တို့ ကော်ဖီမစ်ထုပ်တို့ ပေါက်ပြန်ရော။ ထီကျတော့ထိုးလား ဆိုတော့လည်း မထိုးခဲ့တာ နှစ်နဲ့ချီကြာနေတာ ခုချိန်တိုင်ပါပဲ။ ထီထိုးမယ့် ပိုက်ဆံကို တရားပွဲတွေလှူ၊ မိဘမဲ့ကလေးတွေလှူ၊ ကြွလာတဲ့သံဃာတွေလှူနဲ့ပဲ နေလာခဲ့တာ။ အဲ ဟိုတစ်လောက သူငယ်ချင်းများဖိုရမ်ကနေ တွေ့ဆုံပွဲလုပ်မလို့ လာခဲ့ပေးပါဆိုလို့ ကျောင်းကနေ အပြေးလေးတစ်ပိုင်းနဲ့ သွားလိုက်ပါတယ်။ တာမွေမွန်းမှာလုပ်တာဆိုတော့ အချိန်တော့ နည်းနည်းပေးရတာ ပေါ့။ ဟိုရောက်တော့ လာတဲ့ မန်ဘာတွေ အချင်းချင်းမိတ်ဆက် မိဘမဲ့တွေလှူမယ့်အစီအစဉ်တွေပြောကြနဲ့ ပြီးတော့ လာတဲ့သူတွေကို မဲဖောက်ပေးဖို့ ဆု ၄ ဆု စီစဉ်ထားတယ်တဲ့။ စပြီး မဲနှိုက်တော့ မနော မဲက ဗလာကျနေပါတယ်။ ဒီတစ်ခါတော့ ကံမကောင်း နိုင်တော့ပါလား လို့ တွေးနေတုန်းရှိသေးတယ်။ ပထမဆုမဲကို ပယ်မဲထဲ မှားထည့်လိုက်မိလို့ မဲတွေ အကုန်ပြန်ပေးပါ အစအဆုံးအသစ်ပြန်လုပ်ပြီး ပြန်နှိုက်ရမယ်လို့ပြောပြီး သိမ်းသွားပါရော။ နောက် အစကနေ ပြန်နှိုက်ရတော့ တစ်ခုပြန်ယူလိုက်ပါတယ်။ ဖွင့်လည်းကြည့်လိုက်ရော ပေါက်မဲနံပါတ် ၃ တဲ့ ကိုယ့်မျက်လုံးတောင် ကိုယ်မယုံဘူး။ ခုနတုန်းကတော့ ဗလာဖြစ်နေတယ်။ ပြန်နှိုက်တော့ ပေါက်နေပါလားပေါ့။ အားလုံးကို ပြောလိုက်တော့ အစ်မ ကံကိုက အမအတွက် ဖြစ်လာတာတဲ့လေ။ အံ့သြမိပါရဲ့။ ကျန်တဲ့အသေးအမွှားတွေတော့ မပြောတော့ပါဘူး။

အဲ ခုတစ်ခါကတော့ ချစ်သူများနေ့မှာ (ဦးပိုင်) 547 Trading က ပြုလုပ်တဲ့ ၁၄ ရက် ၂ လ ၂၀၁၁ ခုနှစ် ချစ်သူများနေ့ ဈေးရောင်းပွဲတော်မှာ ကံစမ်းမဲလက်မှတ်များ ရောင်းချပါတယ်။ ရုံးက အစ်မတစ်ယောက်က ဝယ်လာပြီး ပြောတယ် ကားရရင် ဘယ်သွားမယ်တို့ ဘာတို့ပြောတော့ မကြီး အဲဒါ ဘာလဲလို့မေးတော့ ကံစမ်းမဲ တစ်ထောင်နဲ့ ဝယ်လာတာတဲ့။ ဘယ်ကဝယ်လာတာလဲဆိုတော့ စထရယ်ဟိုတယ်ရှေ့မှာ ရောင်းနေတာပြောတော့ ရုံးက အန်တီတွေကလည်း မုန့်စားသလောက်ပဲရှိတယ် ကံစမ်းမယ်ဆိုပြီး အလုပ်က မောင်လေးတစ်ယောက်ကို သွားဝယ်ပေးဖို့ပြောတော့ မနောလည်း အင်တာနက် ၂ နာရီစာဖိုးတော့ ရှိမှာပဲ မှာလိုက်ဦးမယ်ဆိုပြီး ဝယ်ခိုင်းလိုက်ပါတယ်။ အဲဒီမောင်လေးပြန်လာတော့ ၁၀ ရက်နေ့က ဝယ်ခိုင်းတာ ဆိုတော့ ၁၄ ရက်နေ့ နေ့လည် ၁၂ နာရီ မျှော်စင်ကျွန်းမှာ မဲဖောက်မယ်လို့ပြောတယ် ဆုပေါက်တဲ့သူတွေကို စထရယ်ဟိုတယ်မှာ စာရွက်နဲ့ကပ်ပေးထားမယ်ပြောလိုက်တယ်လို့ပြောပါတယ်။ ဝယ်လာတဲ့ နံပါတ်က ဟိုအန်တီနှစ်ယောက်က ၄၅၅၊ ၄၅၆ ဖြစ်ပြီး မနော နံပါတ်က ၄၅၇ ဖြစ်ပါတယ်။ ၁၄ ရက်နေ့ ရောက်တော့ တစ်ယောက်နဲ့တစ်ယောက် နောက်ကြပါတယ်။ မနောကတော့ ပြောလိုက်ပါတယ်။ ၄နဲ့ ၅ ပေါင်းရင် ၉ နဝင်းလို့ နောက်က လပ်ကီး ၇ လို့ အားလုံးပေါင်းရင် လပ်ကီး ၇ နံပါတ်လို့ ပြောလိုက်မိပါသေးတယ်။ ဖုန်းလာမယ် ကားရမယ်တို့ဘာတို့ ပြောနေကြတာ တစ်နေကုန်သွားတော့ လူတွေ ဒီလောက်များတာ တို့တွေ ဗလာမဲထဲ ပါပြီနဲ့တူတယ်လို့ ပြောကြပြီး ၁၅ ရက်နေ့ရောက်တော့ မေ့မေ့ပျောက်ပျောက်ပါပဲ။ နေ့လည် ကော်ဖီသောက်ချိန်ပြီးတော့ ၃ ခွဲလောက် အစ်မ ဖုန်းလာနေတယ်ပြောလို့ သူငယ်ချင်းဆီက ဖြစ်မယ်ပြောပြီး ကိုင်လိုက်တော့ စထရယ်ဟိုတယ်က ဆက်တာပါ ကံစမ်းမဲ နံပါတ် ၀၄၅၇ ပေါက်ပါတယ် မနက်ဖြန် ၁၁ နာရီကို စထရယ်ဟိုတယ်ကို လာပေးပါလို့ ပြောပြီး ဘာပစ္စည်းပေါက်တာလည်း မေးလို့မရခဲ့ဘူး။ ရုံးကလူတွေကတော့ တစ်ရုံးလုံးမှာ နင်ပေါက်တာဆိုတော့ အတော်ကံကောင်းတယ်တဲ့။ ဒါနဲ့ မနောလည်း အိမ်ပြန်ရောက်တော့ တစ်ထောင်နဲ့ ဝယ်ထားတဲ့လက်မှတ်က ကံစမ်းမဲပေါက်တယ်ပြောလိုက်တော့ အိမ်က ကားရပါဆိုပြီး ပြောကြတယ်။ မနောစိတ်ကတော့ ဘာပဲရရ အရမ်းကြီးလည်း ဘာလိုချင်တယ်ဆိုတာ စိတ်မှာ မဖြစ်မိဘူး။ တစ်ထောင်နဲ့ထိုးထားတာ ဘာရရ တန်ပါတယ်လို့ ပြန်ပြောလိုက်တယ်။ ၁၆ ရက်နေ့ရောက်တော့ အလုပ်က အဘနဲ့ ဦးလေးတစ်ယောက်က လိုက်ပေးပါတယ်။ ဟိုရောက်တော့ ခုမှ ဦးပိုင်မှာ သွားထုတ်နေတုန်းတဲ့ ခဏတော့စောင့်ရမယ် ဘာရတယ်ဆိုတာလည်း သူတို့လည်းမသိဘူးတဲ့။ ဒါနဲ့ ကြာနေမှာစိုးလို့ ပြန်လာပြီး ထမင်းစားပြီးချိန်ကို ရုံးက အဘကို မလိုက်ခိုင်းတော့ပဲ ဦးလေးက သူ လိုက်ခဲ့မယ်ပြောပြီး သွားကြတယ်။ ဟိုတယ်ရောက်တော့ ဝန်ထမ်းတွေကလည်း ဘာပေါက်တာလဲတဲ့ သူတို့လည်းသိချင်တယ်ပေါ့ မနောက ပြန်ပြောလိုက်တယ်။ ပေါက်မဲနံပါတ်တွေနဲ့ သတင်းစာမှာ ပစ္စည်းစာရင်းတွေပါတယ် ကြည့်လိုက်ပါလို့ ပြောလိုက်တယ်။ ခဏပြန်လာတော့ သတင်းစာရောက်တော့ ကိုယ်က ဘာပေါက်တယ်ဆိုတာ သိပြီးနေပြီ စတီးအိုး ၁၀ လုံး ပေါက်တာဆိုတော့ သိပ်တော့ မကြီးလောက်ဘူးပေါ့။ ဒါနဲ့ ဟိုတယ်ရောက်တော့ မန်နေဂျာက နာမည်နဲ့နံပတ်ပဲပြောရသေးတယ် အထူးဆု လာထုတ်တာပဲတဲ့ သူက ပြောတယ် မနောကတော့ ရောက်တော့ ပစ္စည်းတွေက ပလတ်စတစ်ချိုင့်တွေကော မြင်တော့ ဒီလိုပုံစံပဲပေါ့။ နောက်လည်းကျရော အလားလား စတီးအိုး ၁၀ လုံးထည့်ထားတဲ့ စက္ကူဗူးကြီးက နည်းတာ မဟုတ်ဘူး။ အထူးဆုတဲ့လေ။ လုံခြုံရေးကို သယ်ခိုင်းတော့ တစ်ယောက်ထဲမနိုင်လို့ နှစ်ယောက်ဝိုင်းမရတယ်။ ဒါနဲ့ ရုံးကို ကားငှားပြီးပြန်၊ ညနေ အလုပ်ဆင်းတော့ အိမ်ကို ကားငှားပြန်ခဲ့ရတာပေါ့။ ရုံးက အန်တီတွေကတော့ ပြောတယ် အဲဒါ မနော ကံကြောင့် ရတာတဲ့။ ရှေးဘဝက ကုသိုလ်ကြောင့်တဲ့ မနောလည်း ဘာကြောင့်ဆိုတာ မသိတော့ပါဘူးရှင်။ ဘာပဲဖြစ်ဖြစ် မဲပေါက်တော့လည်း အလုပ်က လူတွေကို မုန့်ဝယ်ကျွေးပြီး ဒါနလုပ်ဖြစ်သွားတာပေါ့နော်။ ချစ်သူများနေ့ရဲ့ အမှတ်တရပဲ ဖြစ်ပါတော့တယ်။ ချစ်သူရှိမှ ပျော်ရွှင်ရတာမဟုတ်ပါဘူး။ တစ်ယောက်ထဲလည်း နေတတ်ရင် ကျေနပ်စရာပါလို့ ဒီနေရာကနေ ပြောလိုက်ပါရစေရှင်……………………..


No comments:

Post a Comment